«بيقولوا كلام مينفعش يتقال خالص» .. عمر كمال يدعم قرار هاني شاكر بمنع مطربي المهرجانات

كتب   شروق خالد
    21 نوفمبر 2021     ‪7:38 AM‬  
«بيقولوا كلام مينفعش يتقال خالص» .. عمر كمال يدعم قرار هاني شاكر بمنع مطربي المهرجانات

علق مطرب المهرجانات عمر كمال، علي الأزمة القائمة بين نقابة المهن الموسيقية ومطربي المهرجانات بعد صدور قرار بمنع 19 منهم من الغناء.

وأوضح "كمال"، خلال مداخلة هاتفية مع الدكتور معتز عبد الفتاح، مقدم برنامج "تحت الشمس" عبر قناة "الشمس" رأيه في تلك الأزمة بقوله: "أنا أولا نص أعمالي أغاني ونصها مهرجانات، وأنا عندي حل للخناقة دي كلها، قرار الأستاذ هاني شاكر فيه جزء كبير صح وأنا معاه قلبا وقالبا، لأنه بجد في ناس بتوع مهرجانات بيقولوا كلام مينفعش يتقال خالص، وأنا كعمر بتأذي منه، والفئة دي فعلا لازم تتمنع، أنا بقول ده إزاي يتقال، لأنها شتايم علني وعيني عينك، النوع ده لازم يتمنع".

وتابع بحسم: "لكن في نفس الوقت نقابتنا المحترمة بجد أجازت الراب، ومنحت الراب مساحة كبيرة جدا على المسارح وشرعية، وما شاء الله برضو بيعموا بلاوي أكتر من المهرجانات وشغالين، أغاني كتير جدا ليهم فيها خناقات برضو وشتائم وقلة أدب، ومع ذلك النقابة اعترفت به وعملتله شعبة، طيب ما إحنا نعمل شعبة مهرجانات ببساطة".

واختتم: "زي ما عمر كمال راح النقابة ومضى إقرار أنه أي أغنية هينزلها هتُجاز من الرقابة، ده يتعمم ونعمل شعبة للمهرجانات، لكن موضوع الأصوات ما هو برضو بتوع الراب مش أصوات، بتاع الراب مش بيدخل يمتحن في الأطلال وعمر الخيام يعني، ما هو بيدخل يغني راب، يبقى بتاع الراب يدخل يغني راب، وبتاع المهرجانات يدخل يغني مهرجانات، خلوا المهرجانات فن زي الراب".

وجدير بالذكر أن، نقابة المهن الموسيقية قد أعلنت منذ أيام عن أسماء الممنوعين من الغناء وذلك لعدم تقنين أوضاعهم بالنقابة خلال الفترة الماضية، وشملت: حمو بيكا وحسن شاكوش وكزبرة وحنجرة ومصطفي زكريا الشهير بمسلم وأبو ليلة وأحمد قاسم الشهير بـ"فيلو" وأحمد موزة وحمو طيخة وريشا كوستا وسمارة وشواحة وولاد سليم والعصابة والزعيم وعلاء فيفتى وفرقة الكعب العالى ومجدى شطة ووزة وشكل وعمرو حاحا.

كما أصدرت نقابة المهن الموسيقية قرارًا بإيقاف الفنان حسن أبو الروس، لعدم امتثاله لقرارات النقابة وعدم التزامه بالمظهر العام والقواعد العامة الخاصة التي تفرضها النقابة.