أيمن نور الدين يكتب: انتعاشة المسرح المصرى بين القاهرة والرياض
كتب أيمن نور الدين
2 ديسمبر 2021 2:33 AM
طول عمر المسرح المصرى بيعرض فى مختلف دول العالم، عادل إمام كان بيسافر بمسرحياته وسمير غانم ومحمد صبحى وغيرهم.
لكن الفرق..
إن المسرحيات دى كانت بتتعرض فى مصر الأول وبتنطلق من مصر ويمكن تفضل سنين تعرض فى مصر، قبل ما تسافر رحلات وتعرض للجمهور الخليجى اللى مابيقدرش ييجى على مصر.
طبعا المسرح المصرى كان جاذب للسياحة الخليجية وكنت تدخل المسرحية فى القاهرة والاسكندرية تلقى الصفوف الأولى غالبا محجوزة للجمهور الخليجى والأشقاء العرب.
مسرح القطاع الخاص كان جزء أصيل من ليالى القاهرة الساهرة.
لكن دلوقتى الوضع اتغير..
مسارح كتيرة مصرية إنطفأت أنوارها فى القاهرة..
ومبقاش السائح الخليجى وخاصة السعودى مضطر أنه يروح مصر عشان يشوف مسرح لأن المسرح بييجى لغاية عنده.
وساهم فى ده فيروس كورونا اللى أثر على حركة السفر.
عدد كبير من المسرحيات المصرية تم إنتاجها دفعة واحدة، لتعرض فى موسم الرياض هذا العام بشكل لافت للنظر.
هنيدى ومحمد سعد وأحمد فهمى وأشرف عبد الباقى وبيومى فؤاد وغيرهم.
طبعا أنا سعيد بإنتعاش الحركة الثقافية والفنية فى السعودية وحب الأشقاء السعوديين للفنانين والفن المصرى بصفة خاصة.
لكن هل ده يعتبر إنتعاش للمسرح المصرى .. حتى لو ولد على أرض غير مصرية ؟
