أيمن نور الدين يكتب: ثورة النقيب بسبب التمور والحليب !
كتب أيمن نور الدين
2 ديسمبر 2021 2:39 AM
مايقصدش عمر كمال أنه يهين مصر لما قال فى السعودية واقفين على أرض طاهرة..
ولا قصده أنه يقول على مصر أرض الخمور والحشيش.
وأصلا ماهى الجملة متغيرة من زمان فى أغنية بنت الجيران لـ "من غيرك مش حاعيش"
مبقاش فيها كلمة "خمور وحشيش" أصلا..
ده غير أن الكلمة خرجت منه بعفوية وهو باين مش متعلم التعليم اللى يخليه يميز معنى كل كلمة بيقولها.
قرار التحقيق معاه متسرع..
احنا كده .. حنبان بنتلكك .. وواقفينلهم عالواحدة .. وبنكسبهم تعاطف.
وحيقولوا سبنالكم البلد .. وبرضه مش عاتقينا.
والمفروض النقابة والنقيب أكبر من الكلام ده.
ومش معقولة النقابة مبقاش عندها سيرة الفترة الأخيرة غير بتوع المهرجانات..
وبعدين التحقيق مع عمر كمال .. عشان حاجه زى دى، محرج للعلاقات المصرية والسعودية على المستوى الشعبى.
ولا النقابة بقت بتحب التريندات .. هى كمان..
كلنا ضد الإسفاف وزعلانين على اللى جرى للأغنية، بس طريقة التصدى ليهم مش لازم تبقى متعسفة..
خاصة أنتوا اللى سبتوهم سنين .. لما بقى ليهم شعبية مش فى مصر وحدها.
اللى بيحصل ده كله لمصلحتهم .. وبيزيدهم أهمية وتأثير وشعبية .. يا أولى الألباب.
