جايز بعض تصرفات شيرين غلط..

جايز بتعك .. لما بتحب او لما بتكره..

جايز تبان ساعات متناقضة ومترددة ومجنونة.

جايز مابتفكرش قبل ما تتكلم .. وبتصرح بحاجات صادمة.

وده بيعملها مشاكل سواء كإنسانة أو فنانة..

جايز كلامها مش موزون..

ولا يتقال عنها أنها ست العاقلين..

لكن رغم كل ده..

ميزتها اللى بقت نادرة فى الزمن ده .. 

أنها مش كدابة..

بتقول أحاسيسها بصدق جدا..

مابتظهرش بوش غير بوشها الحقيقى..

مبسوطة بتقول أنها مبسوطة..

حزينة بتقول أنها حزينة..

سواء مع صحابها أو فى البرامج أو فى الحفلات..

سيان ..

كله بوش واحد..

ولا يهمها بقى برستيج ولا منظرة..

ولا تخاف من الشماتة ولا تمثل عالناس فى البرامج أنها جولييت..

ولا تعرف غير إظهار الحقيقة..

ولما تكون مش عايزة تعرف حد بحالتها..

بتختفى .. وتنعزل .. مابتشافش 

لأنها عارفة أنها لو ظهرت لازم تقول الصدق..

عشان كده مانكسفتش أنها تقول..

أنها لسه بتحب حسام..

رغم الطلاق!

ايوه لسه بتحبه.. 

ماهو ده اللى حاصل عندها بالفعل..

وهى دى شحاعة الصدق..

والقلوب مش بإيدينا..

مهما زعلنا أو غضبنا..

الناس بتشتمها..

بتقول معندهاش كرامة..

ازاى تقول أنها لسه بتحبه ؟ 

كانوا عايزينها تكذب أو تخبى.. 

بالعكس اللى بيكذب هو اللى معندهوش كرامة..

اللى بيعرف الصدق بيعرف الحب.. 

واللى مايعرفوش .. عمره ماعرف الحب 

أنا لا مع رجوعهم ولا ضد رجوعهم..

لكن احترمت صدقها وشجاعتها.. 

فى زمن اتملى بالكذب والكذابين..