أيمن نور الدين يكتب: أحمد مجاهد اشتغل الكل.. وطلع بالبرتغالي كارلوس 

كتب   بقلم: أيمن نور الدين 
    8 سبتمبر 2021     ‪5:24 PM‬  
أيمن نور الدين يكتب: أحمد مجاهد اشتغل الكل.. وطلع بالبرتغالي كارلوس 
يوووه بقالنا يومين.. وماكينة التكهنات الخاطئة نازلة ترف فوق دماغتنا..
 
بالنسبة لمين هو خليفة حسام البدري في تدريب المنتخب القومي لكرة القدم 
واللى يقولك حسام حسن هو الأصلح
 
واللى يقولك لاا.. حسام لاا.. حسام عصبي وبيتخانق وروحه في مناخيره 
 
وحسام نفسه شحن الموبايل على الآخر وقعد يستنى 
ان حد يتصل بيه .. ابدا 
ونزل صورته بفانلة المنتخب.. لعل وعسى حد يشوفها 
وبعدين شالها.. لحسن يتقال عليه عبده مشتاق 
 
واللى يقولك المعلم حسن شحاته هو الخبرة والتاريخ ويلا نرجع الأمجاد مع المعلم 
ومش بس كده..
 
ده كمان  اختاروا كل مساعدينه وطاقمه
 
واللى يقولك لااا لااا 
كل ده غلط..
ده الاختيار وقع على إيهاب جلال وأهو إعتذر أهو عن تدريب نادي الإسماعيلي عشان يتفرغ للمنتخب بقى 
وإيهاب جلال هو اللي جاي جاي 
 
واللى يقولك.. فينجادا.. المدرب البرتغالي 
هو فينجادا مافيش غيره.. 
 
 كل ده وأحمد مجاهد واتحاد الكرة ووزارة الشباب طبعاً.. سابوا المحللين الرياضيين يفتوا براحتهم ويصرحوا هنا وهناك زى ماهما عايزين.. 
وكله عامل انه جايب المعلومة من بق السبع 
وان معاه مصادره العليوي
 
وأتاري الاتحاد مكتم عالسر.. اللي محدش قال عليه 
وهو إن الاختيار كان من نصيب كارلوس كيروش المدرب البرتغالي 
لتولي قيادة تدريب منتخبنا القومي
 
وتبقى مفاجأة للجميع.. على حد سواء 
وبصراحة.. اتحاد الكرة نجح في تسويح الكل وسابهم جميعا يهروا 
وأدار عملية الإطاحة بالبدري وتعيين خليفة له بجدارة 
 
من غير ولا حس ولا خبر.