ريهام سعيد للدكتور اشرف زكى .. والنبى خلينى أمثل

كتب   بقلم/ أيمن نور الدين
    23 يوليو 2021     ‪6:14 PM‬  
ريهام سعيد للدكتور اشرف زكى .. والنبى خلينى أمثل

هى ريهام سعيد قررت تعتزل الاعلام ولا الإعلام هو اللى قرر يعتزلها ؟

اصلها تفرق كتير بصراحة مش عايز ادوس على ريهام فى نقطة ضعفها، وان مافيش قنوات قابله بيها حاليا من بعد الحلقة الهامة اللى كشفتلنا ريهام من خلالها كيفية صناعة الكفتة فى اوضة النوم ! وان مشيها ورا التريند .. جابلها الكافية وعلى كل حال ده مش موضوعنا موضوعنا كالآتى .. يعنى ايه ياريهام تطلبى من نقيب الممثلين يساعدك تمثلى ؟ ماتسيبى الراجل فى حاله وهمه ومسئولياته المتلتله واعضاءه اللى مش لاقيين شغل هى نقابة الممثلين ناقصة ياريهام ؟ وبعدين د. اشرف اكاديمى وفنان ونقيب وواعى .. ومعتقدش هيخاطر المخاطرة دى لكن للحق وعشان اكون منصف معاكى ميزة التمثيل انك حتضطرى تلتزمى بالنص ومش حتتكلمى على كيفك وده فى حد ذاته انجاز .. اعتزالك للإعلام فى نفس الوقت اللى بتعلنى فيه عن رغبتك فى التمثيل فكرنى بالأستاذ فؤاد المهندس وهو بيقول بلاها سوسو .. خد نادية وطبعا سوسو هو الاعلام ونادية هى التمثيل وده كان فى مسرحية سك على ريهام قصدى سك على بناتك !