ايه يعنى بطولة العالم فى الاسكواش ؟ احنا أكبر من كده !

كتب   بقلم/ أيمن نور الدين
    23 يوليو 2021     ‪9:35 PM‬  
ايه يعنى بطولة العالم  فى الاسكواش  ؟ احنا أكبر من كده !

آسفين يا نور ياقمرة ياسكرة ..

يابنت مصر المشرفة ..

يارافعه راسنا قصاد الدنيا بحالها ياام أحلى ابتسامة بطعم الفرحة اللى بتيجى بعد التعب والعرق والمجهود..

ياللى أخدتى خمس مرات فى عين الحسود بطولة العالم فى الاسكواش..

ياللى العالم كله بيحكى عن أمجادك..

معلش يانور اننا فى مصر يعنى .. مش بنديكى حقك اعلاميا واننا مش مركزين معاكى أوى وان الدنيا مش مقلوبة عليكى ولا حاجه، على اعتبار يعنى .. ان ايه يعنى بطولة العالم ولا حتى عشر بطولات ؟

احنا أكبر من كده،، احنا اهتماماتنا متركزه على حاجات أهم بكتير ..

عندنا مثلا خناقة بين البوركينى والبيكينى ومشغولين فى حفلات الساحل المشهيصة ولوك أصالة الجديد الصبيانى وخناقة حمو بيكا مع عمر كمال وياترى دى خناقة بجد ولا تريند ؟

ومشغولين فى اللى قتلت جوزها بسبب التكييف .. وياترى مستحمله حر السجن ازاى دلوقتى ؟

كل دى حاجات شغلانا وواخده كل وقتنا وانتى أكيد مقدره انشغالاتنا،،

أما فى الرياضة بقى فاحنا بنحبها بطعم التعصب بين نادى الأهلى والزمالك فى كرة القدم أما ان مصر تاخد بطولة العالم للاسكواش للمرة الخامسة فده بالنسبالنا حدث عادى خااااالص و لا حتلاقى يانور محللين رياضيين ولا فترات مفتوحة ولا فيديوهات طالعة ترد على بعضها..

الاسكواش يانور مافيهوش رضا عبد العال ولا أبو المعاطى زكى ولا عبد الناصر زيدان يشعللولنا السوشيال ميديا فارضى بقليلك يانور وعقبال البطولة العشرين .